ಬಂಧಡ್ ಆನಿ ಸುಟ್ಕಾ- By Juliana Carlo

ಬಂಧಡ್ ಆನಿ ಸುಟ್ಕಾ

ಮಾರ್ಚಾಚಾ 21 ತಾರಿಕೆ ಪರ್ಯಾಂತ್ ಕಸಲಿಚ್ ಬಂಧಡ್ ನಾಸ್ತಾನಾ ಆಪ್ಣಾಕ್ ಖುಶಿ ಆಸಾ ಥಂಯ್ ಸ್ವತಂತ್ರ್‍ಪಣಿ0 ಭಂವೊನ್ ಆಸ್ಚಾ ಲೊಕಾಂಕ್ ಎಕಾ ದಿಸಾಚೆಂ ಜನತಾ ಕಫ್ರ್ಯೂ ಜ್ಯಾರಿಯೆಕ್ ಹಾಡ್ತಾಂವ್ ಮ್ಹಣ್ ಸಾಂಗೊನ್ 22 ತಾರೀಕೆರ್ ಲೋಕ್ ಸಗ್ಳೊ ಭಿತರ್ ಬಸ್ಲೊ. ಆಯ್ತಾರಾಚೊ ದೀಸ್ ಕುಟ್ಮಾದಾರಾಂ ಸಾಂಗಾತಾ ಮೆಳೊನ್ ಅರಾಮಾಯೆನ್ ಸಂತೊಸಾನ್ ಖುಶಾಲ್‍ಭರಿತ್ ಜಾವ್ನ್ ದೀಸ್ ಸಂಪಯ್ತಾನಾ ಹೆಂ ಜನತಾ ಕಫ್ರ್ಯೂ ಮಾರ್ಚಾಚಾ 30 ತಾರೀಕೆ ಪರ್ಯಾಂತ್ ವಾಡೈತಾಂವ್ ಮಣ್ ಲೊಕಾಚಿಂ ಮನಾಂ ತಯಾರಿ ಕೆಲಿ. ಆನಿ 24 ತಾರೀಕೆರ್ ರಾತಿಂ 8 ವೊರಾರ್ ಆಮ್ಚಾ ಪ್ರಧಾನ್ ಮಂತ್ರಿನ್ 21 ದಿಸಾಂಚೆಂ ಬಂಧಡ್ ಪರ್ಗಟ್ ಕೆಲೆಂ. ಮಾರ್ಚಾಚಾ 24 ತಾರೀಕೆ ಥಾವ್ನ್ ಎಪ್ರಿಲಾಚಾ 14 ತಾರೀಕೆ ಪರ್ಯಾಂತ್ 3 ಹಪ್ತ್ಯಾಚಿ ಬಂಧಡ್ ಅನಿ ಹ್ಯಾ ವೆಳಾರ್ ಸುರು ಜಾಲೊ ಲೊಕಾಂಚೊ ಆಕಾಂತ್, ಭ್ಯೆಂ ಭಿರಾಂತ್. ಭ್ಯೆಂ ಆಪ್ಣಾಚಿಂ ಭುರ್ಗಿಂ ಪರ್ಗಾವಾಂತ್ ಆಸಾತ್ ತಿಂ ಕಶಿಂ ಆಸಾತ್ ಕೊಣ್ಣಾ? ತಿಂ ಜೆವಾಣ್ ಕರ್ತಾತ್‍ಗೀ? ತಾಂಕಾಂ ಜೆವಾಣ್ ಸಮ ಮೆಳ್ತಾಗಿ? ಅಸಲಿಂ ಭೊಗ್ಣಾಂ ತರ್, ಆಮ್ಕಾಂ ಘರಾಂ ಥಾವ್ನ್ ಕೆದಾಳಾ ಭಾಯ್ರ್ ವಚೊಂಕ್ ಮೆಳಾತ್? ಎಕ್‍ಚ್ಚ್ ಪಾವ್ಟಿಂ ಅಸಲಿ ಬಂಧಡ್ ಲೊಕಾಕ್ ನಾನಾಂತ್ಯಾ ಸಮಸ್ಯಾಂಕ್ ಕಾರಣ್ ಜಾಲಿ. ದುಬ್ಳ್ಯಾ ಲೊಕಾಕ್ ಜೆವ್ಣಾಕ್ ಕಾಂಯ್ ಮೆಳಾನಾತ್‍ಲ್ಲಿ ಪರಿಗತ್. ಕಾಮಾಕ್ ವೆತಾಲ್ಯಾ ಲೊಕಾಕ್ ಕಾಮ್ ನಾಸ್ತಾನಾ ಪಯ್ಶ್ಯಾಂಚಿ ಆರ್ಥಿಕ್ ಪರಿಸ್ಥಿತೆಚಿ ಅಡ್ಚಣ್. ಪಯ್ಶೆ ಅಸ್‍ಲ್ಲ್ಯಾಂಕ್ ಪಿಡೆಚಿ ಭಿರಾಂತ್. ‘ಹಿ ಪಿಡಾ ಕೊಣಾಕ್ ಆಸಾ ಮ್ಹಣ್ ಕಳ್ಚೆಂ ಕಶೆಂ. 14 ದೀಸ್ ಗುಪಿತ್ ಆಸ್ಚಿ ಪಿಡಾ ಕೊಣಾಕ್ ಆಸಾ ಕೊಣಾಕ್ ನಾ ತೆಂ ಪಾರ್ಕುಂಚೆಂ ಕಶೆಂ? ಘರಾಚಾ ಭಾಯ್ರ್ ವಚೊಂಕ್ ಕಾವ್ಜೆಣಿ , ಮ್ಹಾಕಾ ಪಿಡಾ ಯೆತಾಗೀ? ಮ್ಹಜಿ ಪಿಡಾ ಮ್ಹಜಾ  ಕುಟ್ಮಾಂಚಾ ಸಾಂದ್ಯಾಂಕ್ ಲಾಗ್ತಾಗೀ? ಅಸಲಿಂ ನಾನಾಂತಿಂ ಚಿಂತ್ನಾಂ ಮತಿಕ್ ಯೇವ್ನ್ ಸಬಾರ್ ಜಣಾಂಚಿ ನೀದ್‍ಚ್ ಪಾಡ್ ಜಾಲ್ಯಾ. ತರ್ ಸಬಾರ್ ಜಣಾಂಕ್ ಘರಾ ಭಿತರ್ ಫಿಚಾರ್ ಜಾವ್ನ್ ಮತಿಕ್ ವಿರಾರಾಯ್. ಏಕ್ ದೀಸ್ ದೋನ್ ದೀಸ್ ನೈ, 3 ಹಫ್ತೆ ಘರಾ ಭಿತರ್ ಬಸ್ಚೆಂ ಕಶೆಂ? ಘರಾ ಭಾಯ್ರ್ ವಚೊನ್ ಘರ್ಚೊ ವಸ್ತು ಹಾಡ್ಚ್ಯೊ ಕಸ್ಯೊ? ಆಮ್ಕಾಂ ಅಸಲಿ ಪರಿಗತ್ ಯೆಂವ್ಚಾಕ್ ಕಾರಣ್ ಕಸಲೆಂ? ಅನಿ ಹಿ ಕೊರೊನಾ ಮ್ಹಳ್ಳಿ ಮಾರೆಕಾರ್ ಪಿಡಾ ಅಮ್ಕಾಂ ಯೇನಾತ್ಲ್ಯಾ ಪರಿಂ ಅಡಾಂವ್ಚೆಂ ಕಶೆಂ? ಆಶೆಂ ಸವಾಲಾಂಚಿ ಶಿಂಕಾಳ್ ವಾಡಾತ್ತ್ ಗೆಲಿ.

ಆಮ್ಕಾಂ ಸರ್ವಾಂಕ್ ಕಳಿತ್ ಆಸ್‍ಲ್ಲ್ಯಾ ಪ್ರಕಾರ್ ಚೀನಾಚಾ ವೂವನ್ ಗಾಂವಾಂತ್ 2019 ನವೆಂಬರ್ ಮಹಿನ್ಯಾಂತ್ ಹಿ ಪಿಡಾ ಅಸ್‍ಲ್ಲಿ. ತರಿ ತಾಂಣಿಂ ಹಾಚೆವಿಶಿಂ ಚಡಿತ್ ಗುಮಾನ್ ದೀಂವ್ಕ್ ನಾಸ್ತಾನಾ ಚೀನಾಂತ್ ಹಿ ಪಿಡಾ ವಾಡಾತ್ತ್ ಗೆಲಿ.  ಚೀನಾ ಗಾಂವ್ಚೊ ಲೋಕ್ ಇಟಲಿ, ಕೆನಡಾ ಅಸಲ್ಯಾ ಗಾಂವಾಂತ್ ವಚೊನ್ ಜನವರಿಂತ್ ಇಟಲಿಕ್ ಹಿ ಕೊರೊನಾ ಪಿಡಾ ಪಾವ್ಲಿ. ಚೀನಾಚಾ ವೂವನ್ ಯುನಿವರ್ಸಿಟಿಂತ್ ಶಿಕ್ಚಾ ಕೇರಳಾಚಾ ತಿರುಚನಪಳ್ಳಿಚಾ ವಿದ್ಯಾರ್ಥಿನ್ ಆಪ್ಲ್ಯಾ ಮಾಂಯ್ ಗಾಂವಾಂಕ್ ಯೇವ್ನ್ ಪಯ್ಲೆ ಪಾವ್ಟಿಂ ಜನವರಿಚಾ 30 ತಾರೀಕೆರ್ ಅಮ್ಚಾ ಭಾರತ್ ದೇಶಾಕ್ ಆಯ್ಲಿ ಹಿ ಕೊರೊನಾ ಪಿಡಾ ಆತಾಂ ವಿಸ್ತಾರೊನ್ ವಚೊನ್ 5 ಹಜಾರ್ ಲೊಕಾ ಪ್ರಾಸ್ ಚಡ್ ಜಣಾಂಕ್ ಲಾಗ್ಲ್ಯಾ ತರ್ ಮುಖ್ಲ್ಯಾ ದಿಸಾಂನಿ ಆಮ್ಚಾ ಭಾರತ್ ದೇಶಾಚಿ ಪರಿಸ್ಥಿತಿ ಕಶಿ ರಾವಾತ್ ಮುಳ್ಳಿ ಖಂತ್ ಹರ್ಯೆಕಾ ವ್ಯಕ್ತಿಕ್ ದೊಸ್ಚೆಂ ಸವಾಲ್.  ಪಯ್ಲೆಂಚ್ ಜಾಗ್ರುತ್ಕಾಯ್ ಘೆತ್‍ಲ್ಲಿ ಜಾಲ್ಯಾರ್ ಪಾವ್ಣೆ ದೋನ್ ಕೊರೊಡ್ ಲೋಕ್ ವಿಮಾನ್ ಪಯ್ಣಾರ್ ಯೆಂವ್ಚೆಂ ಅಡಾವ್ಯೆತ್.  ಕೊರೊಡಾನಿಂ ಲೋಕ್ ರೈಲಾರ್, ಬಸ್ಸಾರ್ ಹೆವ್ಶಿನ್ ತೆವ್ಶಿನ್ ಪಾಶಾರ್ ಜಾವ್ನ್ ಹಿ ಪಿಡಾ ವಿಸ್ತಾರುಂಕ್ ಕಾರಣ್ ಮ್ಹಳ್ಯಾರ್ ಚೂಕ್ ಜಾಯ್ನಾ. ಕ್ರೀಸ್ತೀ ಭಾವಾರ್ಥಿ ಲೋಕ್ ಪ್ರಾಚಿತ್ ಕಾಳಾಚಾ ಸುರ್ವೆರ್ ಆಸ್ತಾನಾಂಚ್ಚ್ ಪಿಡೆಚಿ ಖಬರ್ ಥಂಯ್ ಹಾಂಗಾ ಆಯ್ಕೊಂಕ್ ಮೆಳ್ತಾಲಿ ತರಿ ತ್ಯಾ ಪಿಡೆಚಿ ಗಂಭೀರಾಯ್ ಸಮ್ಜೊಂಕ್ ಅರ್ಧೊ ಪ್ರಾಚಿತ್ ಕಾಳ್ ಸಂಪ್ಲೊ ಆನಿ ಆಮ್ಕಾಂ ಕ್ರಿಸ್ರಿ ಪರ್ಜೆಕ್ ಪಯ್ಲೆ ಪಾವ್ಟಿಂ ಮಿಸಾಚೆಂ ಬಲಿದಾನ್ ಭೆಟೊಂವ್ಚಾಕ್ ಬಂಧಡ್ ಪಡ್ಲಿ.  ಆಮ್ಚಾ ಇಗರ್ಜಾಂಚಿಂ ಬಾಗ್ಲಾಂ ಧಾಂಪ್ಲಿಂ. ಪವಿತ್ರ್ ಎವ್ಕರಿಸ್ತ್ ಸೆಂವ್ಕ್ ಅವ್ಕಾಸ್ ನಾಸ್ತಾನಾ ಆಮ್ಚಿ ಪವಿತ್ರ್ ಸಭಾ ಬೆಜಾರಾಯ್ ಉಚಾರುಂಕ್ ಪಾವ್ಲಿ.  ಸಬಾರ್ ಜಣಾಂಕ್ ಟಿಪ್ಪುಚಾ ಕಾಳಾಚೊ ಉಡಾಸ್ ಆಯ್ಲೊ. ವ್ಹಯ್ ತ್ಯಾ ಕಾಳಾರ್ ಆಸ್‍ಲ್ಲೊ ಭಾವಾರ್ಥಿ ಲೋಕ್, ಆಮ್ಕಾಂ ಆತಾಂ ಆಸ್ಚಾ ಬಂಧಡೆ ಪ್ರಾಸ್ ಚಡಿತ್ ಮಾರೆಕಾರ್ ಬಂಧಡೆಂತ್ ಆಸ್‍ಲ್ಲೊ. ಕಿತ್ಯಾಕ್ ತಾಂಕಾಂ ಭಾವಾರ್ಥ್ ಸಾಂಡ್ಚಾಕ್ ದಗ್ದವ್ಣಿ ಮೆಳ್ತಾಲಿ. ಮಂಗ್ಳುರ್ ಥಾವ್ನ್ ಶ್ರೀರಂಗಪಟ್ಟಣಾಕ್ ಕ್ರಿಸ್ತಿ ಲೊಕಾಂಕ್ ಅಂಬುಡ್ನ್ ವೋಡ್ನ್ ವರ್ತಾನಾ ಸಬಾರ್ ಜಣಾಂ ವಾಟೆರ್‍ಚ್ಚ್ ಮರಣ್ ಪಾವ್ಲ್ಯಾ0ತ್. ಉರುಲ್ಲ್ಯಾ ಥೊಡ್ಯಾಂಕ್ ಥಂಯ್ಸರ್ ಪೊಟಾಕ್ ದಿನಾಸ್ತಾನಾ ಕಷ್ಟಿಲಾಂ. ಹಾತಾಂಚ್ಯೊ ನಾಕ್ಷೊ ವೋಡ್ನ್ ಕಾಡ್ನ್ ಜಿವೆಂಚ್ ಕಷ್ಟಿಲಾಂ.  ನಾನಾಂತಿ ಇಜಾ ತಾಂಕಾಂ ಮೆಳ್ಳ್ಯಾ ತರಿ ತಾಂಣಿ ಆಪ್ಲೊ ಭಾವಾಡ್ತ್ ಸಾಂಡುಂಕ್ ನಾ.  ಫಕತ್ ತೇರ್ಸ್ ಮ್ಹಣೊನ್ ಕೊಂತಾಚ್ಯೊ ಮಣಿಯೊ ಗಳವ್ನ್ ಎಕಾಮೆಕಾ ಆಧಾರ್ ದೀವ್ನ್ ತಾಂಚೊ ಬಾವಾಡ್ತ್ ಜಿವೊ ದವರ್ಲೊ.  ಮೊರಾ ಪರ್ಯಾಂತ್ ಭಾವಾಡ್ತಾನ್ ತಿಂ ಜಿಯೆಲಿಂ. ಸಬಾರ್ ಕಾಳ್ ತಾಂಣಿಂ ಹಿ ಬಂಧಡ್ ಭಗ್‍ಲ್ಲಿ.  ತಾಂಚೆವಿಶಿಂ ಆಮಿ ಚಿಂತನ್ ಕೆಲೆಂ ತರ್ ಆಮ್ಚಿ ಬಂಧಡ್ ಕಿತೆಂಚ್ ನೈ. ಆಮ್ಕಾಂ ದಿಸ್ಪಡ್ತೆಂ ದೆವಾಚೆಂ ಉತಾರ್ ವಾಚುನ್ ದೈವಿಕ್ ಬಳ್ ಜೋಡ್ನ್ ಘೆವ್ಯೆತ್.  ಪ್ರಗತಿಪರ್ ಆಯ್ಚಾ ಹ್ಯಾ ಆಧುನಿಕ್ ಕಾಳಾರ್ ಅಂತರ್‍ಜಾಳಾ ದ್ವಾರಿಂ ಆಮ್ಕಾಂ ಘರಾ ಭಿತರ್ ಬಸೊನ್ ದೆವಾಚಾ ಉತ್ರಾಂಚೊ ನಿಯಾಳ್ ಕರುನ್ ದಿಂವ್ಚೆ ಸೆರ್ಮಾಂವ್ , ಮಿಸಾಚೆಂ ಬಲಿದಾನ್, ಅರಾಧನ್ ಅನಿ ಹ್ಯಾ ಪ್ರಾಚಿತ್ ಕಾಳಾರ್ ಖುರ್ಸಾವಾಟ್ ಕರುನ್ ದೆವಾಚಿ ಕುರ್ಪಾ ಚಡಿತ್ ಮಾಪಾನ್ ಅಪ್ಣಾವ್ಯೆತ್. ಖಂಯ್ಸರ್ ಭಾವಾಡ್ತ್ ಅಸಾ ಥಂಯ್ಸರ್ ಭರ್ವಸೊ ಅಸ್ತಾಲೊ.  ಅಮಿ ಕ್ರಿಸ್ತಿ ಭಾವಾಡ್ತಿ ಮನ್ಶ್ಯಾಂ ಜೆಜುಚಾ ಜಿವಂತ್ಪಣಾಚೊ ಸಂಭ್ರಮ್ ಘರಾ ಬಿತರ್‍ಚ್ವ್ ರಾವೊನ್ ಮಾಗ್ಣ್ಯಾಚಾ ಸ್ಪಿರಿತಾನ್ ಆಚರಣ್ ಕರ್ಚೆಂ ಭಾಗ್ ಹ್ಯಾ ವರ್ಸಾ ಆಮ್ಕಾಂ ಲಾಭ್ಲಾಂ. ತರಿಪುಣ್ ಆಮ್ಚೊ ಭಾವಾಡ್ತ್ ದಂಡಳ್ನಾಸ್ತಾನಾ ಪ್ರಾಚಿತ್ ಕಾಳ್ ಕಾಬಾರ್ ಕರ್ನ್ ಪಾಸ್ಕಾಂಚೊ ಕಾಳ್ ಸಂಪವ್ನ್ ಪೆಂತೆಕೊಸ್ತ್ ಪರ್ಯಾಂತ್ ಆಮಿ ಪರತ್ ಆಮ್ಚಾ ಬಂಧಡೆಂತ್ ಅಸ್ಚೊ ಸಂಧರ್ಬ್ ಅಮ್ಕಂ ಲಾಭ್ಲಾ ತರಿ ದೆವಾಚೆರ್ ಭಾವಾರ್ಥ್ ಥಿರ್ ದವರ್ಯಾಂ.  ಸಾಂ ಪಾವ್ಲುನ್ ಸಾಂಗ್‍ಲ್ಲ್ಯಾಪರಿ ಅಮಿ ವಾಂಚ್ಲ್ಯಾರಿ, ಅಮಿ ಮೆಲ್ಯಾರಿ ದೆವಾಚಿಂಚ್ಚ್. ಪುಣ್ ಧೈರ್ ಚುಕಂವ್ಚೆಂ ನೈ. 

ಹ್ಯಾ ಕೊರೊನಾ ಪಿಡೆಚಿ ಲಕ್ಷಣಾ ಅಮಿ ಜಾಣಾ ಜಾಲ್ಯಾಂವ್.  ಅನಿ ತಿ ವಿಸ್ತಾರ್ನಾಶೆಂ ಕಶೆ ಕ್ರಮ್ ಘೆವ್ಯೆತ್ ಮ್ಹಳ್ಳಿ ಸಮ್ಜಣಿ ಅಮ್ಕಾಂ ಮೆಳ್ಳ್ಯಾ.  ಹ್ಯಾ ವೆಳಾರ್ ಲೊಕಾಚಿ ಸೆವಾ ಕರ್ಚಾ ಕಾರ್ಯಕರ್ತಾಂಚಿ, ಪೋಲಿಸ್ ಸಿಬ್ಬಂದಿಂಚಿ ತಶೆಂಚ್ ಪಿಡೆಸ್ತಾಂಚಿ ಸೆವಾ ದಿಂವ್ಚಾ ದಾಕ್ತೆರ್, ನರ್ಸ್ ಆನಿ ವೈದ್ಯಕೀಯ್ ಸಿಬ್ಬಂದಿಚಿ ಸೆವಾ ಅಮಿ ವಾಖಣ್ಲ್ಯಾರ್ ಮಾತ್ರ್ ಪಾವಾನಾ.  ತಾಂಚಾ ಕಷ್ಟಾಂಚೊ ಥೊಡೊ ನಿಯಾಳ್ ಆಮಿ ಕರುಂಕ್ ಫಾವೊ.  ಅಮಿ ಘರಾ ಭಿತರ್ ಸುರಕ್ಷಿತ್ ಅಸಾಂವ್. ಅಮಿ ಚಿಂತ್‍ಲ್ಲೆ ಪ್ರಕಾರ್ ಜೆವಾಣ್ ಮೆಳಾನಾ ಜಾಂವ್ಕ್ ಪುರೊ.  ಪುಣ ತಾಂಕಾಂ ತಾಂಚಾ ಘರಾ ಭಿತರ್ ವಚೊಂಕ್ ಭಿರಾಂತ್ ಕಿತ್ಯಾಕ್ ಖಂಯ್ ಪುಣೀ ಆಪ್ಣಾಕ್ ಹಿ ಪಿಡಾ ಆಯ್ಲ್ಯಾರ್ ಅಪ್ಣಾಚಾ ಕುಟ್ಮಾಕ್, ಕುಟ್ಮಾಂಚಾ ಮೊಗಾಚ್ಯಾ ಸಾಂದ್ಯಾಂಕ್, ಭುಗ್ರ್ಯಾಂಕ್ ಲಾಗಾತ್ ಮ್ಹಳ್ಳ್ಯಾ ಭಿರಾಂತಿನ್ ಆಸ್ಪತ್ರ್ಯಾಂನಿಂಚ್ ರಾವ್ತಾತ್.  ದೀಸ್ ರಾತ್ ತಿಂ ವಾವ್ರ್ ದಿತಾತ್. ವೆಳಾರ್ ಪೊಟಾಕ್ ಮೆಳಾನಾ, ಬರಿ ನೀದ್ ನಾಸ್ತಾನಾ, ಸವ್ಕಸಾಯ್ ನಾಸ್ತಾನಾ ನಿಸ್ವಾರ್ಥಿ ಥರಾನ್ ಸೆವಾ ದಿತಾತ್. ತರ್ ಅಮ್ಕಾ ಅಮ್ಚಾ ಘರಾ ಭಿತರ್ ಹಿ ಪಿಡಾ ನಿವಾರಣ್ ಜಾತಾ ಪರ್ಯಾಂತ್ ಥೊಡೆ ಭಾಂದ್ಪಾಸ್ ಭೊಗ್ಲ್ಯಾರಿ ಸಮಾಧಾನೆನ್ ಸವ್ಕಸಾಯೆನ್ ಅಪ್ಲ್ಯಾಚ್ ಘರಾಂತ್ ಅಪ್ಲ್ಯಾ ಕುಟ್ಮಾದಾರಾಂ ಸವೆಂ ರಾವೊಂಕ್ ಮೆಳ್‍ಲ್ಲೊ ಹೊ ಅವ್ಕಾಸ್ ಬರ್ಯಾನ್ ಗಳ್ಸುನ್ ಘೆವ್ಯಾಂ.  ಸದಾಂಚೆಂ ಕಾಮ್ ಸೊಡ್ಲ್ಯಾರಿ ಕುಟ್ಮಾಕ್ ದಿಂವ್ಕ್ ವೇಳ್‍ಚ್ ನಾತ್‍ಲ್ಲ್ಯಾ ಹ್ಯಾ busy ಸಂಸಾರಾಂತ್ ಅತಾಂ ಮೆಳ್‍ಲ್ಲೊ ಹೊ ಅವ್ಕಾಸ್ ಬರ್ಯಾನ್ ಗಳ್ಸಿಯಾಂ. ದಾಕ್ತೆರ್ ನರ್ಸಾಂ ಸಕಾಳಿಂ ಫಳಾರ್ ಸೆವ್ಲ್ಯಾರ್ ದೊನ್ಪರಾಂಚೆಂ ಜೆವಾಣ್ 4 ವೊರಾರ್ ಘೆತ್ಲ್ಯಾರಿ ಜಾಲೆಂ. 12 ಘಂಟೆ ಕಾಮ್ ವಿರಾಮ್ ನಾಸ್ತಾನಾ ಕರ್ತಾನಾ ಅಮ್ಕಾಂ ಮೆಳ್ಚೊ ವಿಶೆವ್, ಮೆಳ್‍ಲ್ಲೆಂ ಖಾಣ್ ದೆವಾಕ್ ಅರ್ಗಾಂ ದೀವ್ನ್ ತಾಚಿ ಸ್ತುತಿ ಕರುನ್ ತಾಚೆರ್ ಭರ್ವಸುನ್ ಆಮ್ಕಾಂ ಅಸ್‍ಲ್ಲಿ ಹಿ ಬಂಧಡ್ ವೆಗ್ಗಿಂಚ್ ಕಾಬಾರ್ ಜಾಂವ್ಚಾಕ್, ಪಿಡೆಕ್ ಫಾವೊ ತೆಂ ವಕಾತ್ ಸೊಧುನ್ ಕಾಡ್ಚಾಕ್, ಅಮಿ ಅಮ್ಚಿಂ ಮಾಗ್ಣಿಂ ಭೆಟೊವ್ಯಾಂ. ಜೆಜುನ್ ಅಪ್ಲೆಂ ಮಿಸಾಂವ್ ಕಾಮ್ ಧರ್ಚಾ ಪಯ್ಲೆಂ 40 ದೀಸ್ ಉಪಾಸ್ ಮಾಗ್ಣೆ ಕೆಲೆಂ.  ದೆವಾಚಾ ದಯೆನ್ ಅಮ್ಕಾಂ ಥೊಡೆಂ ತರಿ ಜೆವಾಣ್ ಮೆಳ್ತಾ ತೆಂ ಸೆವ್ನ್ ಕಿತ್ಲೆಶಾ ದುಬ್ಳ್ಯಾ ಲೊಕಾಂಕ್ ಕಾಮ್ ನಾಸ್ತಾನಾ ಜೆವಾಣ್ ನಾಸ್ತಾನಾ ಕಷ್ಟೊಂಚಾ ಲೊಕಾಂಚೊ ಉಡಾಸ್ ಅಮಿ ಕಾಡುನ್ ಅಮ್ಕಾಂ ಕಿತೆಂ ಮೆಳ್ತಾ ತಾಂತು ತೃಪ್ತಿ ಅಮಿ ಜೊಡ್ಯಾಂ. 

ದೆವಾಚೆಂ ಉತರ್ ಅಮ್ಕಾಂ ಸಾಂಗ್ತಾ: 1ಪೆದ್ರು 5:7 ತುಮ್ಚೊ ಹುಸ್ಕೊ ತಾಚೆರ್ ಸೊಡಾ ಕಿತ್ಯಾಕ್ ತೊಚ್ಚ್ ತುಮ್ಚಿ ಜತನ್ ಘೆತಾ.  ರೊಮಾಗಾರಾಂಕ್ ಬರಯಿಲ್ಲ್ಯಾ ಪತ್ರಾಂತ್ ಅಧ್ಯಾಯ್ 8 ವಾಕ್ಯ್ 37-ಜೆಜು ಮಾರಿಫಾತ್ ಅಮಿ ಸಂಪೂರ್ಣ್ ಜಯ್ತ್ ಜೊಡ್ತಾಂವ್.  ತಶೆಂಚ್ಚ್ 2 ತಿಮೊಥಿ 1:7 ಆಮ್ಕಾಂ ಸಾಂಗ್ತಾ: ದೆವಾನ್ ಅಮ್ಕಾಂ ಭಿಯೆಂವ್ಕ್ ಕರ್ತಾ ತೊ ಅತ್ಮೊ ದೀಂವ್ಕ ನಾ.  ಅಮ್ಕಾಂ ಬಳ್ವಂತ್ ಮೊಗಾಳ್ ಅನಿ ಸ್ವನಿಯಂತ್ರಿತ್ ಕರ್ತಾ ತೊ ಅತ್ಮೊ ದಿಲಾ.  ಪರತ್ ಫಿಲಿಪ್ಪಿಗಾರಾಂಕ್ ಬರೈಲ್ಲ್ಯಾ ಪತ್ರಾಂತ್ ಅಧ್ಯಾಯ್ 4: 13 ಆಮ್ಕಾಂ ಸಾಂಗ್ತಾ: ಮಾಕಾ ಬಳ್ ದಿತಲ್ಯಾ ಸವೆಂ ಸರ್ವ್ ಸಂಗ್ತಿ ಹಾಂವ್ ಕರುಂಕ್ ಸಕ್ತಾಂ. ದೆಕುನ್ ಅಮಿ ಭಿಯೆಂವ್ಚೆಂ ನಾಕಾ.  ದೆವಾಚಾ ಉತ್ರಾಂದ್ವಾರಿ ಧೈರ್ ಜೊಡ್ನ್ ಘೆವ್ಯಾಂ. 

ಚೀನಾಂತ್ 76 ದಿಸಾಂನಿ ಹಿ ಬಂಧಡ್ ಸಂಪ್ಲಿ.  ಅಮ್ಚಿ ಹಿ ಬಂಧಡ್ ಖಂಡಿತ್ ಸಂಪ್ತೆಲಿ.  ಹ್ಯಾ ಖಾತಿರ್ ಭರ್ವಸೊನ್ ಆತಾಂ ಮೆಳ್‍ಲ್ಲೊ ಅವ್ಕಾಸ್ ಬರ್ಯಾನ್ ಗಳ್ಸುನ್ ಆಮ್ಚಾ ರಕ್ಷಣೆ ಖಾತಿರ್ ಆಸಲ್ಲಿ ಹಿ ಬಂಧಡ್ ಬರೆಂಪಣ್ ಚಿಂತುನ್ ಸಮಾಧಾನೆನ್ ಸಾರ್ಯಾಂ.  ನಾ ತರ್ ಕುಟ್ಮಾಂತ್ಲೊ ಏಕ್ ಸಾಂದೊ ಉಣೊ ಜಾಲ್ಯಾರಿ ಉರುಲ್ಲೊ ಸಾಂದೆ ತ್ಯಾ ಸಾಂದ್ಯಾಂ ಖಾತಿರ್ ಖರ್ಗತಾನಾ ಅಮ್ಚೆಂಚ್ಚ್ ಉಣೆಪಣ್ ಅಮ್ಕಾಂ ಭಗ್ತೆಲೆ. ದೇವ್ ಕರ್ತಾ ತೆಂ ಸಗ್ಳೆಂ ಆಮ್ಚಾ ಬರ್ಯಾಕ್  ಮ್ಹಳ್ಳೆಂ ಸಮ್ಜೊವ್ನ್ ತಾಚೆರ್ ಭರ್ವಸೊನ್ ಅಮ್ಚೆಂ ಜಿವಿತ್ ಸಮಧಾನೆನ್ ಸಾರುಂಕ್ ದೆವಾಚೊ ಆಧಾರ್ ಜೊಡ್ಯಾಂ.

Written by: Juliana Carlo  / Ward : Konchady Lower