ಇಗರ್ಜೆ ವಾಡ್ಯಾoತ್ ವಾಡ್ಯಾ ದೀಸ್ ಆಚರಣ್

ಅಕ್ಟೋಬರ್ 26 ತಾರಿಕೆರ್, ಇಗರ್ಜೆ ವಾಡ್ಯಾಗಾರಾನಿಂ ಸಾಂಗಾತಾ ಮೆಳೊನ್ ವ್ಹಡಾ ಸoತೊಸಾನ್ ಆಪ್ಲ್ಯಾ ವಾಡ್ಯಾಚೊ ದೀಸ್ ಆಚರಣ್ ಕೆಲೊ. ಆದ್ಲ್ಯಾ ದಿಸಾ ಸನ್ವಾರಾ ಸಾಂಜೆರ್ 5 ವೊರಾಂಚೆಂ ಮೀಸ್, ಸಾಯ್ಬ್ ಸಾಲ್ವಾದೊರಾನ್ ಕೆಲ್ಲ್ಯಾ ಸರ್ವ್ ಉಪ್ಕಾರಾಂಕ್ ಅರ್ಗಾo ಜಾವ್ನ್ ಭೆಟಯ್ಲೆಂ. 26 ತಾರಿಕೆರ್ ಆಯ್ತಾರಾ ಸಾಂಜೆರ್ 6.30 ವೊರಾರ್, ಹ್ಯಾಬಿಟೇಟ್ 154ಚ್ಯಾ ಮಾಳಿಯೆ ಸಾಲಾಂತ್ ಸರ್ವ್ ವಾಡ್ಯಾಗಾರಾo ಸಾಂಗಾತಾ ಜಮ್ಲ್ಯಾoವ್. ಹ್ಯಾ ಕಾರ್ಯಾಕ್ ಮುಖೆಲ್ ಸಯ್ರೆ ಜಾವ್ನ್ ಆಮ್ಚೆ ಫಿರ್ಗಜ್ ವಿಗಾರ್ ಮಾ. ದೊ. ಜೋಸೆಫ್ ಮಾರ್ಟಿಸ್ ಆನಿಂ ಸಹಾಯಕ್ ಫಾ. ನೆಲ್ಸನ್ ಪೆರಿಸ್ ಹಾಜರ್ ಆಸ್ಲೆ.
ಗುರ್ಕಾರ್ ಕ್ಲಾರಾ ಮಿರಾಂದಾನ್ ಜಮ್ಲೆಲ್ಯಾ ಸರ್ವಾಂಕ್ ಮೊಗಾಚೊ ಯೆವ್ಕಾರ್ ಮಾಗ್ಲೊ. ಹ್ಯಾಚ್ ದೀಸಾ ವಾಡ್ಯಾಚ್ಯಾ ಪ್ರತಿನಿಧಿಂಚೆo ಚುನಾವ್ ಆಸಲ್ಲೆo, ಆನಿಂ ಹೆಂ ವಿಗಾರ್ ಬಾಪಾನಿಂ ಕಾಜಿತೊರ್ ಬಾಪಾಚಾ ಸಹಕಾರನ್ ಚಲವ್ನ್ ವೆಲೆಂ. ಹಾoತು ಶ್ರೀಮಾನ್ ರೊನಿ ಸಿಕ್ವೇರಾ ಆನಿo ಶ್ರೀಮತಿ ಶೀಲಾ ಕಾಸ್ಟಲಿನೊ ವಿoಚುನ್ ಆಯ್ಲಿo. ಹಾಂಕಾ ದೊಗಾoಯ್ಕಿ ವಿಗಾರ್ ಬಾಪಾನಿo ಅಭಿನಂದನ್ ಪಾಠವ್ನ್ ಬೊರೆಂ ಮಾಗ್ಲೆo. ಪಾಟ್ಲ್ಯಾ ತೀನ್ ವರ್ಸಾo ಆಪುರ್ಬಾಯೆಚಿ ಸೆವಾ ದಿಲ್ಲ್ಯಾ ಶ್ರೀಮತಿ ಸಬಿತ ಫೆರ್ನಾಂಡಿಸಾಕ್ ದೇವ್ ಬೊರೆo ಮ್ಹಣೊನ್, ಮುಕಾರೀ ತಿಚಿ ಸೆವಾ ಮುಂದರುಂಕ್ ಉಲೊ ದಿಲೊ.
ಹಾಚೆ ನಂತರ್ ವಾಡ್ಯಾ ದಿಸಾಚೆo ಕಾರ್ಯಕ್ರಮ್, ಶ್ರೀಮತಿ ಜೇನ್ ಆನಿಂ ಪoಗ್ಡಾನ್ ಮಾಗ್ಣ್ಯಾ ಗಿತಾದ್ವಾರಿo ಆರಂಭ್ ಕೆಲೆo. ಕಿಯಾರಾ ಆನಿಂ ಕಿಯಾನ್ ಹ್ಯಾ ಭುರ್ಗ್ಯಾನಿಂ ಆಜ್ಯಾ-ಆಜಿಯೆ ವಿಶಿo ಏಕ್ ಸುಂದರ್ ಪದ್ ಗಾಯ್ಲೆo. ಉಪ್ರಾಂತ್ ತಾಣಿo ಎರಿಕಾ ಸಾಂಗಾತಾ ಮೆಳೊನ್ ಆಪುರ್ಬಾಯೆಚೊ ನಾಚ್ ಪ್ರದರ್ಶಿತ್ ಕೆಲೊ. ಶ್ರೀಮತಿ ಸಬಿತ ಅನಿಂ ಫ್ಲೋರಿನ್, ಈತಲ್ ಆನಿಂ ಶ್ರೀಮತಿ ಅನುಷಾ ಹಾಣಿo ಅಪಾಪ್ಲ್ಯಾ ನಾಚಾದ್ವಾರಿo ಸರ್ವಾoಚಿ ಮನಾo ಧಾದೊಶಿ ಕೆಲಿo. ಶ್ರೀಮತಿ ಜೇನಾನ್ ಏಕ್ ಸೊಬಿತ್ ಪದ್ ಗಾಯ್ಲೆo. ಶ್ರೀಮತಿ ಫ್ಲೋರಿನ್, ಶ್ರೀಮತಿ ಸಬಿತ ಆನಿಂ ರೋನಿನ್ ಏಕ್ ನಾಟ್ಕುಳೊ ಖೆಳೊನ್ ಸರ್ವಾoಕ್ ಹಾಸಯ್ಲೆo. ಶ್ರೀಮಾನ್ ರಿಚ್ಚರ್ಡ್ ಆನಿಂ ಶ್ರೀಮಾನ್ ರೂಬೆನಾನ್ ವಾಜಾoತ್ರಾ ಖೆಳೊನ್ ಸಕ್ಡಾoಕ್ ಖುಷಿ ಕೆಲೆo. ವಿಗಾರ್ ಬಾಪಾನಿಂ ಆಪ್ಲ್ಯಾ ಸಂದೇಶಾಂತ್, ಇಗರ್ಜೆ ಲಾಗಿಂ ಆಸ್ಚಾ ಇಗರ್ಜೆ ವಾಡ್ಯಾಂತ್ ಜಾಂವ್ಚ್ಯಾ ಸರ್ವ್ ಚಟುವಟಿಕೆನಿಂ ವಾಡ್ಯಾಗಾರಾನಿಂ ಸಾಂಗಾತಾ ಮೆಳೊನ್ ಸರ್ವ್ ಕಾರ್ಯಿಂ ಯಶಸ್ವಿ ಕೆಲ್ಲ್ಯಾಕ್ ಉಲ್ಲಾಸ್ ಪಾಟಯ್ಲೆ ಆನಿಂ ವಾಡ್ಯಾಚ್ಯಾ ದಿಸಾಚೆ ಶುಭಾಶಯ್ ಪಾಠಯ್ಲೆ. ಶ್ರೀಮತಿ ಫ್ಲೋರಿನ್ ಫಿಗ್ರೆಡಾನ್ ಸಗ್ಳ್ಯಾ ವರ್ಸಾಚಿ ವರ್ದಿ ಆಪ್ಲ್ಯಾ ಸುಢಾಳ್ ಉತ್ರಾಂನಿಂ ಸಭೆ ಹುಜಿರ್ ದವರ್ಲಿ. ತ್ಯಾಚ್ಚ್ ದೀಸ್ ಕಾಥೊಲಿಕ್ ಸಭೆನ್ ಚಲೊವ್ನ್ ವೆಲ್ಲ್ಯಾ ಭಾಷಣ್ ಸ್ಪರ್ಧ್ಯಾಂತ್, ಭುರ್ಗ್ಯಾಂಚ್ಯಾ ವಿಭಾಗಾಂತ್ ಪಯ್ಲೆಂ ಸ್ಥಾನ್ ಆಪ್ಣಾಯಿಲ್ಲ್ಯಾ ಕುಮಾರಿ ಈತಲಾಕ್ ಗುಲೊಬ್ ದೀವ್ನ್ ಉಲ್ಲಾಸಿಲೆಂ. ಶ್ರೀಮತಿ ಶೀಲಾ ಕ್ಯಾಸ್ಟೆಲಿನೊನ್ ಖೆಳ್ ಚಲೊವ್ನ್ ವೆಲೆ. ಶ್ರೀಮತಿ ಸಬಿತಾ ಫೆರ್ನಾಂಡಿಸಾನ್ ಸರ್ವಾಂಚೊ ಉಪ್ಕಾರ್ ಭಾವುಡ್ಲೊ. ಶ್ರೀಮತಿ ಜಾನೆಟ್ ವೇಗಸಾನ್ ಸಗ್ಳೆಂ ಕಾರ್ಯೆಂ ಆಪುರ್ಬಾಯೆನ್ ನಿರ್ವಹಣ್ ಕೆಲೆಂ. ಫಾ. ನೆಲ್ಸನಾನ್ ಜೆವ್ಣಾಚೆರ್ ಆಶೀರ್ವಾದ್ ಮಾಗ್ಲೆo. ಜೆವ್ಣಾ ಸವೆಂ ಕಾರ್ಯೆಂ ಸಂಪ್ಲೆಂ. ವಾಡ್ಯಾಚ್ಯಾ 37 ಕುಟ್ಮಾಂ ಥಾವ್ನ್ 61 ಸಾಂದೆ ಹಾಜರ್ ಆಸಲ್ಲೆ.