ಕೊಂಚಾಡಿ ಪಯ್ಲ್ಯಾ ವಾಡ್ಯಾಚೆಂ ಪಿಕ್ನಿಕ್

ಕೊಂಚಾಡಿ ಪಯ್ಲ್ಯಾ ವಾಡ್ಯಾಚೆಂ ಪಿಕ್ನಿಕ್

ಅಕ್ಟೋಬರ್ ಮಹಿನ್ಯಾಚಿ 22 ತಾರೀಕ್ ಸಕಾಳಿಂಚಾ 7:30 ವರಾರ್, ಕೊಂಚಾಡಿ ಪಯ್ಲ್ಯಾ ವಾಡ್ಯಾಗಾರಾಂಕ್ ಪಿಕ್ನಿಕಾಕ್ ವರ್ಚ್ಯಾಕ್ ಆಯ್ತೆಂ ಜಾಲ್ಲೆಂ ಬಸ್ಸ್, ಇಗರ್ಜೆ ಮುಖಾರ್ ಆಸ್ಚ್ಯಾ ಬ್ಲೂ ಬೆರಿ ಬಿಲ್ಡಿಂಗಾ ಸಮ್ಕಾರ್ ರಾಕೊನ್ ಆಸಲ್ಲೆಂ. ವ್ಹಡಾ ಹುಮೆದಿನ್ 18 ಸ್ತ್ರಿಯೊ, 8 ಭುರ್ಗಿಂ ಆನಿ 5 ದಾದ್ಲ್ಯಾಂ ಸವೆಂ, ಸಹಾಯಕ್ ವಿಗಾರ್ ನೆಲ್ಸನ್ ಬಾಪಾಂನಿ ಶಿಕಯಿಲ್ಲ್ಯಾ ಮಾಗ್ಣ್ಯಾ ದ್ವಾರಿಂ ಆಮ್ಚೆಂ ಪಯ್ಣ್ 'ಪಾಮ್ ಐಲ್ಯಾಂಡ್' ಕುಶಿನ್ ಸುರ್ವಾತ್ಲೆಂ. ವರ್ತ್ಯಾ ಹುಮೆದಿನ್ ಆಸ್ಲೆಲ್ಯಾ ವಾಡ್ಯಾಗಾರಾಂಕ್, ನಾಚೊನ್-ಉಡೊನ್ ಕಲ್ಯಾಣ್ಪುರ್ ಪಾವಲ್ಲೆಂಚ್ ಕಳೊಂಕ್ ನಾ. ಥಂಯ್ಸರ್ ಮೌಂಟ್ ರೋಜರಿ ಇಗರ್ಜೆಕ್ ಭೆಟ್ ದೀವ್ನ್ ಮಾಗ್ಣೆ ಕರ್ನ್ ಆಮ್ಚೆಂ ಪಯ್ಣ್ ಮುಂದರ್ಸಿಲೆಂ. ಸುಮಾರ್ 10 ವರಾರ್ ಆಮಿಂ ಪಾವೊಂಕ್ ಜಾಯ್ ಆಸ್ಲೆಲ್ಯಾ ಸುವಾತೆಕ್ ಪಾವ್ಲ್ಯಾಂವ್. ಕಾಫಿ-ಫಳಾರ್ ಸೆಂವ್ತಚ್, ಆಮ್ಕಾಂ ಬೋಟ್ ರೈಡ್ ಕರ್ಚಾ ಸುವಾತೆಕ್ ಪಾವಯ್ಲೆಂ. ಥಂಯ್ಸರ್ ಆಮಿಂಚ್ ದೋಣ್ ಒಚ್ಚುನ್ ವೆಚೊ ನವೊ ಅನ್ಭೋಗ್ ಆಮ್ಕಾಂ ಜಾಲೊ. ಲ್ಹಾನಾಂ-ವ್ಹಡಾಂ ಸಮೆಸ್ತಾಂ ಉದ್ಕಾಂತ್ ಉಪ್ಯೆವ್ನ್, 2 ವರಾಂಚೊ ವೇಳ್ ಗೆಲ್ಲೊಚ್ ಕಳೊಂಕ್ ನಾ. ಥೊಡೊ ಪಾವ್ಸ್ ಪಡ್ತಾನಾಂಚ್ ಸಕ್ಡಾಂ ಜಾಗಿಂ ಜಾಲಿಂ ಆನಿ ಬೋಟಿ ಭಿತರ್ ಸರ್ಲಿಂ. ಥಂಯ್ಸರ್ ನಾಚ್-ಪದಾಂ ಸಂಗಿ ಗಮ್ಮತ್ ಕರುನ್,  ಬೋಟಿರ್ ಆಮ್ಕಾಂ ಖೆಳಾಚಾ ಜಾಗ್ಯಾರ್ ಹಾಡ್ನ್ ಪಾವಯ್ಲೆಂ. ದಾಧೊಶಿ ಜೆವಾಣ್ ಜಾತಚ್, ಸಮೆಸ್ತಾಂ ಖಾತಿರ್ ವಿವಿಧ್ ಖೆಳ್ ಆಸಾ ಕೆಲ್ಲೆ. ಹಾಚಿ ಜವಾಬ್ದಾರಿ ವೀಣಾ ಸಲ್ಡಾನ್ಹಾ ಆನಿ ಜೊವಿಟಾ ಪಿಂಟೊ - ಹ್ಯಾ ದೊಗಾಂ ಶಿಕ್ಷಕಾಂನಿ ಘೆತಲ್ಲಿ. ಭುರ್ಗಿಂ ವ್ಹಡಾ ಹುಮೆದಿನ್ ಖೆಳಾಂತ್ ಭಾಗಿದಾರ್ ಜಾಲಿಂ. ಜುಸ್ತ್ 4:30 ವರಾರ್ ಕಾಫಿ-ಫಳಾರ್ ಸೆವ್ನ್ ಜಾತಚ್, ಐವನ್ ಪಿಂಟೊನ್ ಹೌಸಿ-ಹೌಸಿ ಖೆಳ್ ಚಲವ್ನ್ ವೆಲೊ. ಉಪ್ರಾಂತ್ ಹೌಸಿ-ಹೌಸಿ ಆನಿ ಇತರ್ ಖೆಳಾಂತ್ ಜಿಕ್ಲೆಲ್ಯಾಂಕ್ ಇನಾಮಾಂ ವಾಂಟ್ಲಿಂ. ಪರತ್ ಭುರ್ಗಿಂ ಖೆಳೊಂಕ್ ಧಾಂವ್ಲಿಂ ತರೀ, ವೇಳ್ ಜಾವ್ನ್ ಆಯಿಲ್ಲ್ಯಾನ್ ಆನಿ ಬೋಟ್ ತಯಾರ್ ಆಸಲ್ಲ್ಯಾನ್, ಮನ್ ನಾತ್ಲೆಲ್ಯಾ ಮನಾನ್ ಸರ್ವಾಂ ಬೋಟಿರ್ ಬಸೊನ್ ಬಸ್ಸಾ ಲಾಗಿಂ ಪಾವ್ಲ್ಯಾಂವ್. ಬಸ್ಸಾರ್ ಬಸ್ತಾಚ್ ದಾಧೊಶಿ ಮನಾನ್ ಉಪ್ಕಾರ್ ಆಟೊವ್ನ್ ಗುರ್ಕಾರ್ನಿನ್ ಆಮೊರಿ-ತೇರ್ಸ್ ಶಿಕಯ್ಲೊ. ಬೆನ್ನಿ ಟೀಚೆರಿನ್ ಸರ್ವಾಂಚೊ ಉಪ್ಕಾರ್ ಭಾವುಡ್ಲೊ. ಉಪ್ರಾಂತ್ ನಾಚ್ - ಪದಾಂ ಗಾವ್ನ್ ವರ್ತ್ಯಾ ಧಾದೊಸ್ಕಾಯೆನ್ ಪಾಟಿಂ ದೆರೆಬೈಲ್ ಪಾವಲ್ಲೆಂಚ್ ಕಳೊಂಕ್ ನಾ. ಸಗ್ಳ್ಯಾ ದಿಸಾಚಿ ಗೋಡ್ ಚಿಂತ್ನಾ ಆಟೊವ್ನ್, ಆಪಾಪ್ಲ್ಯಾ ಘರಾ ಪಾಟಿಂ ಗೆಲ್ಯಾಂವ್.